[22] อินฺทฺริเยสุ ปเนตฺถ โสตาปตฺติมคฺคญาณํ อนญฺญาตญฺญสฺสามีตินฺทฺริยํฯ
[23] อรหตฺตผลญาณํ อญฺญาตาวินฺทฺริยํฯ
[24] มชฺเฌ ฉ ญาณานิ อญฺญินฺทฺริยานีติ ปวุจฺจนฺติฯ
[25] ชีวิตินฺทฺริยญฺจ รูปารูปวเสน ทุวิธํ โหติฯ
[26] ปญฺจวิญฺญาเณสุ ฌานงฺคานิ, อวีริเยสุ พลานิ, อเหตุเกสุ มคฺคงฺคานิ น ลพฺภนฺติฯ
[27] ตถา วิจิกิจฺฉาจิตฺเต เอกคฺคตา มคฺคินฺทฺริยพลภาวํ น คจฺฉติฯ
[28] ทฺวิเหตุกติเหตุกชวเนสฺเวว ยถาสมฺภวํ อธิปติ เอโกว ลพฺภตีติฯ
[29] ฉ เหตู ปญฺจ ฌานงฺคา, มคฺคงฺคา นว วตฺถุโตฯ
โสฬสินฺทฺริยธมฺมา จ, พลธมฺมา นเวริตาฯ
จตฺตาโรธิปติ วุตฺตา, ตถาหาราติ สตฺตธา;
กุสลาทิสมากิณฺโณ, วุตฺโตมิสฺสกสงฺคโหฯ
โพธิปกฺขิยสงฺคโห
[30] โพธิปกฺขิยสงฺคเห จตฺตาโร สติปฏฺฐานา กายานุปสฺสนาสติปฏฺฐานํ เวทนานุปสฺสนาสติปฏฺฐานํ จิตฺตานุปสฺสนาสติปฏฺฐานํ ธมฺมานุปสฺสนาสติปฏฺฐานํฯ
[31] จตฺตาโร สมฺมปฺปธานา อุปฺปนฺนานํ ปาปกานํ ปหานาย วายาโม, อนุปฺปนฺนานํ ปาปกานํ อนุปฺปาทาย วายาโม, อนุปฺปนฺนานํ กุสลานํ อุปฺปาทาย วายาโม, อุปฺปนฺนานํ กุสลานํ ภิยฺโยภาวาย วายาโมฯ
[32] จตฺตาโร อิทฺธิปาทา – ฉนฺทิทฺธิปาโท วีริยิทฺธิปาโท จิตฺติทฺธิปาโท วีมํสิทฺธิปาโทฯ
[33] ปญฺจินฺทฺริยานิ – สทฺธินฺทฺริยํ วีริยินฺทฺริยํ สตินฺทฺริยํ สมาธินฺทฺริยํ ปญฺญินฺทฺริยํฯ
[34] ปญฺจ พลานิ – สทฺธาพลํ วีริยพลํ สติพลํ สมาธิพลํ ปญฺญาพลํฯ
[35] สตฺต โพชฺฌงฺคา – สติสมฺโพชฺฌงฺโค ธมฺมวิจยสมฺโพชฺฌงฺโค วีริยสมฺโพชฺฌงฺโค ปีติสมฺโพชฺฌงฺโค ปสฺสทฺธิสมฺโพชฺฌงฺโค สมาธิสมฺโพชฺฌงฺโค อุเปกฺขาสมฺโพชฺฌงฺโคฯ
[36] อฏฺฐ มคฺคงฺคานิ – สมฺมาทิฏฺฐิ สมฺมาสงฺกปฺโป สมฺมาวาจา สมฺมากมฺมนฺโต สมฺมาอาชีโว สมฺมาวายาโม สมฺมาสติ สมฺมาสมาธิฯ
[37] เอตฺถ ปน จตฺตาโร สติปฏฺฐานาติ สมฺมาสติ เอกาว ปวุจฺจติฯ
[38] ตถา จตฺตาโร สมฺมปฺปธานาติ จ สมฺมาวายาโมฯ
[39] ฉนฺโท จิตฺตมุเปกฺขา จ, สทฺธาปสฺสทฺธิปีติโยฯ
สมฺมาทิฏฺฐิ จ สงฺกปฺโป, วายาโม วิรติตฺตยํฯ
สมฺมาสติ สมาธีติ, จุทฺทเสเต สภาวโต;
สตฺตติํสปฺปเภเทน, สตฺตธา ตตฺถ สงฺคโหฯ
[40] สงฺกปฺปปสฺสทฺธิ จ ปีตุเปกฺขา,
ฉนฺโท จ จิตฺตํ วิรติตฺตยญฺจ;
นเวกฐานา วิริยํ นวฏฺฐ,
สตี สมาธี จตุ ปญฺจ ปญฺญา;
สทฺธา ทุฐานุตฺตมสตฺตติํส-
ธมฺมานเมโส ปวโร วิภาโคฯ
[41] สพฺเพ โลกุตฺตเร โหนฺติ, น วา สงฺกปฺปปีติโยฯ
โลกิเยปิ ยถาโยคํ, ฉพฺพิสุทฺธิปวตฺติยํฯ
สพฺพสงฺคโห
[42] สพฺพสงฺคเห ปญฺจกฺขนฺธา – รูปกฺขนฺโธ เวทนากฺขนฺโธ สญฺญากฺขนฺโธ สงฺขารกฺขนฺโธ วิญฺญาณกฺขนฺโธฯ
[43] ปญฺจุปาทานกฺขนฺธา – รูปุปาทานกฺขนฺโธ เวทนุปาทานกฺขนฺโธ สญฺญุปาทานกฺขนฺโธ สงฺขารุปาทานกฺขนฺโธ วิญฺญาณุปาทานกฺขนฺโธฯ
[44] ทฺวาทสายตนานิ – จกฺขายตนํ โสตายตนํ ฆานายตนํ ชิวฺหายตนํ กายายตนํ มนายตนํ รูปายตนํ สทฺทายตนํ คนฺธายตนํ รสายตนํ โผฏฺฐพฺพายตนํ ธมฺมายตนํฯ
[45] อฏฺฐารส ธาตุโย – จกฺขุธาตุ โสตธาตุ ฆานธาตุ ชิวฺหาธาตุ กายธาตุ รูปธาตุ สทฺทธาตุ คนฺธธาตุ รสธาตุ โผฏฺฐพฺพธาตุ จกฺขุวิญฺญาณธาตุ โสตวิญฺญาณธาตุ ฆานวิญฺญาณธาตุ ชิวฺหาวิญฺญาณธาตุ กายวิญฺญาณธาตุ มโนธาตุ ธมฺมธาตุ มโนวิญฺญาณธาตุฯ
[46] จตฺตาริ อริยสจฺจานิ – ทุกฺขํ อริยสจฺจํ, ทุกฺขสมุทโย อริยสจฺจํ, ทุกฺขนิโรโธ อริยสจฺจํ, ทุกฺขนิโรธคามินี ปฏิปทา อริยสจฺจํฯ
[47] เอตฺถ ปน เจตสิกสุขุมรูปนิพฺพานวเสน เอกูนสตฺตติ ธมฺมา ธมฺมายตนธมฺมธาตูติ สงฺขํ คจฺฉนฺติฯ
[48] มนายตนเมว สตฺตวิญฺญาณธาตุวเสน ภิชฺชติฯ
[49] รูปญฺจ เวทนา สญฺญา, เสสเจตสิกา ตถาฯ
วิญฺญาณมิติ ปญฺเจเต, ปญฺจกฺขนฺธาติ ภาสิตาฯ